ක්ලැරන්ස්

ක්ලැරන්ස් වි‍ජේවර්ධන. අනිවාර්යයෙන් ම ලංකාවේ සංගීත ක්ෂේත්‍රයේ ඉවත් නොවන නමක්. මේ වෙලාවේ ඔහු ගැන කියන්නේ ඔහු අප අතරින් සමුගෙන පසුගිය 13 දාට 12 වසරක් සපිරෙන නිසා ය. ඇයි අපිට ක්ලැරන්ස් වැදගත් . ඔහුගේ සිංදු ලස්සන නිසා පමණද ?

1943 අගෝස්තු 3 දින උපන් ක්ලැරන්ස් අවුරුදු 23 දී සිය වෘත්තීය සංගීත දිවිය අරඹමින් ලාංකීය සංගීතයේ වෙනසකට මුල පිරුවේ ය. ඔහු ලංකාවට ඉලෙක්ට්‍රික් ගිටාරය ගෙන ආවේ ය. ඒ ගැන චෝදනා ආවිට ඔහු එයට පිළිතුරු දුන්නේ ඉලෙක්ට්‍රක් ගිටාරයෙන් බෙර පද වාදනය කර පෙන්වීමෙනි. (‘සුරඟන වෙස්වලා’ වැනි ගීත). ලංකාවේ පළමු වරට ඩ්‍රම් ෆුට් බ්‍රේක්, සංගීතයට යෙදා ගත්තේ ක්ලැරන්ස් ය. ඒ ගමෙන් ලියුමක් ඇවිල්ලා ගීතයට යි. අද ෆුට් බ්‍රේක් එකෙන් කන් අඩි පලන සංගීත මරුවන් මේවා අහලාවත් නැතුව ඇති. ලංකාවේ පළමු කැසට් පටයේ සංගීත අධ්‍යක්ෂවරයා ක්ලැරන්ස් ය (මිල්ටන් මල්ලවාරචිච්ගේ Any Time Anywhere) . ප්‍රථම වතාවට Multi Track Recording ක්‍රමය අරඹමින් සිංග්ලංකා සමාගම පිහිටවූයේ ක්ලැරන්ස් ය.

මීට වසර කීපයකට පෙර ලංකාවේ ක්ලැසිකල් ගිටාර් වාදනය උගන්වන සංගීතඥයින් තම සිසුන්ට පළමු ව කීවේ Hotel California අහලා එන්න යනුවෙනි. අද සමහරු කියන්නේ ක්ලැරන්ස් සිංදුවක් අහලා එන්න කියා ය. ඒ තරමට ක්ලැරන්ස්ගේ ගිටාර් වාදනය සුවිශේෂී ය. සාමාන්‍ය ගිටාර් වාදකයන් නොකරන පරිදි දකුණතේ මාපටැඟිල්ල ඉහලට චලනයෙන් කරන වාදනය ඔහුගේ වේගවත් මියුරු ගිටාර් වාදනයට හේතුවකි.

ක්ලැරන්ස් ගැන බොහෝ දෙවල් කියන්න තිබුණත් ලියන්න විවේකය අඩු නිසා මෙතනින් නවතින්න වෙනවා. ක්ලැරන්ස් ගැන හොයන්න කැමති නම් ඔහු ඇමරිකාවේ දී කළ Clarence Live In Hollywood ප්‍රසංගය බලන්න. DVD හොයා ගන්න පුළුවන් වේවි.

ජෝර්ජ් බුෂ්ට සපත්තුවකින් ගහන්න කැමති ද?

විභාගේ විභාගේ විභාගේ !!

විශ්ව විද්‍යාලේ පළමු අර්ධවාර්ෂිකයේ වීභාගය ලබන සතියේ පටන් ගන්නවා. කැම්පස් එකේ හා හා පුරා කියලා ලියන විභාගේ නිසා පොඩ්ඩක් බය වෙලා ඉන්නේ. ඒකට මොක ද පොතක් අතින් අල්ලන්නේ නෑ තාමත්. පහුගිය දවස් වල එසයිමන්ට් කරලා බාගෙට මැරිලා ඉන්නේ. අන්තිමට දුන්න ප්‍රංශ කෙටිකතා ගැන ප්‍රශ්නයට පිළිතුර ලිව්වේ ගිය සතියේ සිකුරාදා. ඒ කියන්නේ පිළිතුරු බාරගන්න අවසාන දවස. එදා උදේ 3ට නැඟිටලා 6 වෙනකොට යාන්තං පිටු 30ක් පනින්න ලියා ගත්තා. කොහොම හරි ඒක නිසා දැන් ගීද මොපසාංගේ බාප්පගේ නම ඇහුවත් කියන්න පුළුවන්.  :-)

ලබන සතියේ විභාගේ පටන්ගන්නේ නාට්‍ය හා රංග කලාවෙන්. ඊ ළඟට Image Arts. ඒ දෙක ම එච්චර ප්‍රශ්නයක් නෑ. ඊ ළඟට සිංහල. ඒකට නං තව ටිකක් මහන්සි වෙන්න වෙයි. ගෙදර හිටියොත් මෙලෝ වැඩක්‍ කෙරෙන්නේ නෑ. ඒ නිසා අද හරි හෙට හරි හොස්ටල් යන්න ඔනෙ. අනික ඉතින් ගෙදර ඉඳන් පාඩම් කරන්න ලියාගත්තු නෝට් ඇත්තෙත් නෑනේ. :-)

ගීත එකතුව

මේ දවස්වල බරපතල වැඩකට අතගහල යි ඉන්නේ. මා ලඟ තියෙන සිංදු කන්දරාව පිළිවෙළකට සකස්කරන්න හිතුනා. අවුරුදු ගානක් තිස්සේ එකතු කරපු මේවා දැනට ගායකයාගෙ නමින් සහ ඇල්බම් එකේ නමින් ෆොල්ඩර් බෙදලා විතරයි තියෙන්නේ. ලොකු ම ගැටලුව වෙලා තියෙන්නේ සිංදුවේ නමින් නැතුව වෙනත් නම්වලින් (Track01,Track02 වගේ නම්වලින්) තියෙන ගීත නම් කිරීමයි. සිංදු දාස් ගාණක් එකින් එක අහ අහා නම් කරන එක ලේසි වැඩක් නෙමේ. හැම ගීතයක ම File Name, Title, Album, Artist, Album Art, කියන කොටස් නිවැරදි ව සකස් කරනවා. ගීතවල ගී පද රචකයාගේ නමත් හොයාගන්න පුළුවන් වුණොත් එකත් ඇතුළු කරනවා. සිංහල ගීතවලට ලංකා ගී පොත උදව් කරගන්න පුළුවන් වේවි.

මේවා දැන් වටින්නේ නැති වුණාට තව අවුරුදු කීපයකින් රත්තරං තරම් වටිනවා (ඒවාගේ අගය දන්නා අයට).
ඉස්සර නම් ලැබෙන හැම සිංදුවක් ම හාඩ් එකේ පුරවා ගත්තත් දැන්නම් ඔය අලුත් ගායකයන්ගේ Rap, Rock, Remix, Dj ආදී නම්වලින් හඳුන්වන විකාරයන්ට නිස්කාරනේ ඉඩ නාස්ති කරගන්නේ නෑ. මේ වෙනකං ඉතුරු වෙලා තිබුණු ඒ ජාතියේ ගීත ගිගාබයිට් ගණනාවක් ඊයේ මකා දැම්මා. ඒවා තිබුණට ඇ‍ඟේ හැප්පෙන්නේ නැති වුණත් ගෙදරට එන සමහර යාලුවෝ ෆෝන්වලට, පෙන්වලට, සීඩීවලට, දාගෙන යන්න ඉල්ලන කොට බෑ කියන්න බැනේ. අනාගත පරම්පරාවේ මොළ කුරුවල් කිරීමේ පාප කරුමයන්ට මට හවුල් වෙන්න බැරි නිසා යි ඒවා මකලා දැම්මේ.

හැම වෙලාවෙම මේ සියලු ම ගීතවල බැකප් එකක් තියාගෙනයි ඉන්නේ වියදම් බලන්නේ නැතුව ඒකට වෙන ම බැකප් හාඩ් එකක් ගත්තේ මීට පෙර වතාවක් හාඩ් එකකට හානි වෙලා වටිනා පැරණි ගීත විශාල ප්‍රමාණයක් මට අහිමි වූ නිසායි.

The Pianist – Music was his passion. Survival was his masterpiece

ගිය සතියේ මම, A/L නාට්‍ය හා රංගකලාව ඉගෙන ගත්තු ජයලාල් රෝහණ සර්ගෙ ගෙදර ගිහින් The Pianist චිත්‍රපටිය අරගෙන ආවා. අතිවිශිෂ්ට චිත්‍රපටියක්. ඒ ගැන කියන්න වචන නෑ. ඒක නොබලපු ඇස්දෙකෙන් වැඩක් නෑ. ස්පිල්මාන් (Szpilman)ලෙස රඟපාන රංගන ශිල්පියා ගෙ රඟපෑම විශ්මය ජනකයි. 2002 වසරේ හොඳ ම නළුවා, හොඳ ම අධ්‍යක්ෂණය, හොඳ ම තිර පිටපත සඳහා ඔස්කාර් සම්මාන දිනුවේ මේ චිත්‍රපටය යි. නළුවෙක් කියන්නේ කවුද කියන එක දැන ගන්න ලංකාවෙ සමහර නළු බට්ටන්ට මේ චිත්‍රපටි අතින් වියදම් කරලා පෙන්නන්න වටිනවා. මෙහි බොහොම වටිනා සංගීත ඛණ්ඩ දෙකක් තියෙනවා. එකක් ස්පිල්මාන් සැඟවී සිටිය දී ජර්මන් හමුදා නිලධාරියා හමු වූ විට ස්පිල්මාන් කරන පියානෝ වාදනය . ඔහුගේ මුළු ජීවිතය ම ඒක ඇතුළේ තියෙනවා. අනිත් එක විත්‍රපටියේ අවසානයට තියෙන දීර්ඝ සිම්පනිය. පුළුවන්නම් හොයාගෙන බලන්න. DVD එක ම හොයා ගන්න පුළුවන් වම් හොඳ යි.

http://www.imdb.com/title/tt0253474/
http://www.imdb.com/title/tt0253474/awards
http://en.wikipedia.org/wiki/The_Pianist_%282002_film%29
http://www.thepianistmovie.com/

නදීක ගුරුගේ සමඟ සංවාදයක්

හෙට (2008-11-10-සඳුදා) කැලණිය විශ්වවිද්‍යාලයේ Academic Players මඟින් නව පරපුරේ සංගීත ශිල්පියෙකු වන නදීක ගුරුගේ සමඟ සංවාදයක් පවත්වනවා. අබා, සංකාරා වැනි චිත්‍රපට හරහා සිංහල සිනමාවට නව ‍සංගීත ශෛලියක් හඳුන්වා දුන් සංගීතවේදියෙකු ලෙස නදීක ගුරුගේ හඳුන්වන්න පුළුවන්. ඔහුගේ නිර්මාණ ගැන ඔහුගේ සංගීත භාවිතාවන් ගැන ඔහුත් සමඟ සහෘද සංවාදයක යෙදෙන්න 10වෙනිදා දවල් 2 ට කැලණිය විශ්වවිද්‍යාලයේ ධර්මාලෝක ශාලාව පිටුපස “වලට” එන්න

ආපහු හැරෙන්න බෑ

පසුගිය මාසයේ 30-31 දිනයන්හි දී අපේ විශ්වවිද්‍යාලයේ නාට්‍ය සංගමය වන Academic Players මඟින් රාජිත දිසානායකගේ “ආපහු හැරෙන්න බෑ” නාට්‍ය සහ තුෂාර පීරිස්ගේ “ප්‍රභාකරන්” විත්‍රපටය පෙන්වූවා. 30 දා පෙන්වූ “ආපහු හැරෙන්න බෑ” නාට්‍යයේ දී විශ්වාස කරන්න බැරි දෙයක් වුණා. වැරදිලාවත් නාට්‍යයක් නොබලන අය ඉන්න අපේ රටේ ඒ නාට්‍යය බලන්න දෙදහකට ආසන්න පිරිසක් පැමිණියා. කැලණිය විශ්ව විද්‍යාලයේ ශ්‍රී ධර්මාලෝක ශාලාව (ලෙනින් ශාලාව) පිරෙන්න සෙනඟ. අන්තිමට ආපු සමහරුන්ට බලන්න වුණේ වේදිකාව ඉදිරිපිට බිම ඉඳගෙන. තවත් සමහරු හිටගෙන, සමහරු දොරවල් ජනෙල්වල එල්ලිලා. දෙපස කොරිඩෝවලත් ප්‍රේක්ෂකයෝ. අපට සෙනඟ පාලනය කරගන්න බැරුව ගියා. කොහොම වුණත් නාට්‍යයේ නළු නිළියන් මේ පිරිසට සාධාරණයක් කළ බව කියන්න ඕනේ. සෞම්‍ය ලියනගේ, ඩබ්ලිව්. ජයසිරි, ජයනි සේනාරත්න, බිමල් ජයකොඩි, ආදී ලාංකික රංග ‍ක්ෂේත්‍රයේ ප්‍රවීණයින් නාට්‍යයේ රඟපෑවා. විශේෂයෙන් කියන්න ඕනේ සෞම්‍ය ලියනගේගේ රංගනය ගැන. සැබැවින් ම එය විශ්මිත රඟපෑමක්. රංග කලාව හදාරන්නෙකුට ඔහුගේ රංගනය සජීවී විශ්වවිද්‍යාලයක්.
ප්‍රභාකරන් චිත්‍රපටය ගැන නම් කතා කරලා වැඩක් නෑ. අපට අඩු මුදලකට චිත්‍රපටය ලැබුණු නිසා පෙන්වූවාට අන්තිමට අපට ම හිතුණා මේක චිත්‍රපටයක් ද කියලා. ‍ඒකටත් විශාල ප්‍රෙක්ෂක පිරිසක් නම් පැමිණියා

.

කලකට පස්සේ

පසුගිය මාස තුනටම ලියන්න වුණේ එකම එක ලිපිය යි. උසස් පෙළ ලියලා අවුරුද්දක් ගෙදර ඉඳලා විශ්වවිද්‍යාල ගමනත් එක්ක එක පාරටම කාර්ය බහුල වුණ නිසා මොලේ අවුල් වෙලා. පහුගිය දවස්වල වැඩිපුර නේවාසිකාගාරයේ සිටිය නිසා අන්තර්ජාලයට සම්බන්ධ වනේන ලැබුණේ බොහො ම කලාතුරකින්. කොහොම වුණත් දැන් ගෙදර සිට විශ්වවිද්‍යාලයට යන නිසා තරමක වෙලාවක් ලැබෙනවා. ඒත් සමහර දිනවල ගෙදර එන විට රෑ 11ත් පහුවෙලා. ඒ පසුගිය දිනවල අප පෙන්වූ නාට්‍යවල වැඩකටයුතු රෑවෙන තුරු ම තිබුණු නිසා යි.
ළඟ ඳී පවත්වන්ට යන පුංචි බ්ලොග් මැරතන් එක නම් මරු අදහසක්. මට පහුගිය මැරතන් එකට සහභාගීවෙන්න ලැබුණෙත් නෑනෙ. ඒවෙනකොට මම සිංහල බ්ලොග් ගැන දැනගෙන හිටියෙවත් නෑ. :-)

අවුරුද්දක් ම පැත්තකට දාලා තිබුණු ගිටාරය එළියට ගත්තා. පැත්තකට දාලා තිබුණට ගිටාරයේ හඬට මම හරි ආසයි. ගිටාරය ගැන ඇතිවුණු උනන්දුව නිසා විශ්වවිද්‍යාලයේ සංස්කෘතික මධ්‍යස්ථානයෙන් පවත්වන ගිටාර් පන්තියට සම්බන්ධ වුණේ ගිය සතියේ. එතන ක්ලැසිකල් ගිටාර් උගන්නනවා කියලා දැනගත්තා ම පුදුම සතුටක් දැනුනේ. මා ළඟ තියෙන්නේ ක්ලැසිකල් ගිටාරයක්නේ.

හොඳින් බැරි නම් නරකින් !

මගේ මිතුරෙක් ඉන්නවා. ඔහු ළඟ පැරණි ගීත වටිනා චිත්‍රපට විශාල ප්‍රමාණයක් තිබෙනවා. ඒත් ඔහු ඒවා කාටවත් දෙන්න එච්චර කැමති නෑ. අපේ ගෙදර ආපු වෙලාවට ඔහුගේ pen drive එක මගේ පරිගණකයට සම්බන්ධ කළාම මට එය පිරික්සන්නට වත් ඉඩ දෙන්නේ නෑ. මෙයාට ළඟ දී හොඳ වැඩක් වුණා. මෙයාගෙ පරිගණකය තමයි මම මේ ලෝකෙ දැකපු බරපතල ලෙස ම වයිරස්වලින් හානි වූ පරිගණකය. කොච්චර වයිරස් තියනවා ද කියනවා නම් පරිගණකය පණ ගන්වන්න ම විනාඩි 15 විතර යනවා. අන්තිමේ දී මේක කොහෙත් ම පණගන්වන්න බැරි වුණා.

ඔහු මට කිව්වා පොඩ්ඩක් ඇවිත් පරිගණකය හදලා දෙන්න කියලා. මම ගිහින් බැලුවා. ඒ වෙනකොට ඔහු ළඟ තවත් අලුත් හාඩ් ඩිස්කයක් තිබුණා. මට කරන්න තිබුණේ අලුත් හාඩ් එකට OS එකක් දාලා හොඳ වයිරස් ගාඩ් එකකින් ‍පරණ හාඩ් එක සුද්ද කරන එකයි. ඒත් මම එහෙම නොකර කිව්වා ඒ විදියට කළොත් අලුත් හාඩ් එකටත් වයිරස් එනවා ඒ නිසා පරණ හාඩ් එක මට දෙන්න මම මොනවා හරි කරලා වයිරස් අයින් කරලා දෙන්නම් කියලා. ඒත් ඒකෙ තියෙන පැරණි ගීත චිත්‍රපට මගේ අතර පත් වෙයි කියලා වෙන්න ඇති එයා ඒකට කැමති වුණේ නෑ.

අන්තිමේ දී හොඳින් බැරි නිසා නරකින් වැඩේ කරන්න මට සිද්ධ වුණා. ඔහුගේ ගෙදර ගිය වෙලාවක පැත්තකට දාලා තිබුණු පරණ හාඩ් එක හොරෙන් ම ගෙදර ගෙනාවා. මගේ පරිගණකයට හයි කරලා වයිරස් සුද්දයක් දැම්ම විට පෙනුනා ඒ හාඩ් එකේ ගිගා බයිට් 3 විතරම වැයවෙලා තිබුණේ වයිරස්වලට :-O ඔහු තවම දන්නේ නෑ හාඩ් එක මා ළඟ බව. අවශ්‍ය කරන දේවල් පිටපත් කරගෙන හිමින් සැරේ තිබුණු තැනින් ම ගෙනිහිල්ලා තියනවා. දවසක නැවත ඒක පරිගණකයකට සම්බන්ධ කළොත් ඔහු පුදුම වෙයි තිබුණු වයිරස් වලට මොකද වුණේ කියලා :-)

මම මේ කරපු වැඩේ හරි ද වැරදි ද ?

save

අතීතයෙන් ගඟ ගලා බසී

ජීවිතේ හැමදා ම එක විදියට තියෙන්නේ නෑනේ. ඒ වගේ මගේ ජීවිතෙත් අද ලොකු වෙනසක් වෙන දවසක්. මට මතකයි මම ඉස්සෙල්ලා ම ඉස්කෝලෙ ගිය දවස. එදා ඉඳන් අවුරුදු දහ තුනක් ඉස්කෝලෙ ගියා. යාළුවෝ, පොත් පත්, පිස්සු වැඩ, දඩබ්බර වැඩ, එක්ක ගෙවුණු මගේ ළමා තරුණ විය කොච්චර සුන්දර ද.  මගේ පාසල් විය දැන් ඉවර යි. කොටින් ම අද ඉඳන් මම පාසල් ශිෂ්‍යයෙක් කියලා හඳුන්වන්න බෑ.  ඒත් ඒ කාලෙ ජීවිතේ තියන තුරු අමතක නොවන කාලයක් වේවි. අපේ ජීවිත ඔහොම තමයි ඉතින්. සමුගැනීම්, වියෝ වීම්, අමතක වීම්, වේදනා ඔය හැම එකක් ම තියෙනවා. ඒ හින්දනේ ලෝකේ මෙච්චර ලස්සන. අද ඉඳන් මගේ විශ්වවිද්‍යාල ජීවිතේ ඇරඹෙනවා. අලුත් ලෝකයක්, අලුත් ජීවිතයක් , අලුත් යාළුවෝ, එක්ක කාලය ඉදිරියට ඇදිලා යාවි. ඇත්තෙන්ම මේ හැම දේකම තියෙන්නේ සමුගැනීම නේද කියලා හිතෙනවා. සේකර කිව්වා වගේ ජීවිත ගඟ ගල් කුළු මතින් වැටි වැටී හඬ නඟමින් ඉදිරියට අනාගතයට ගලා යාවි. ඉතින්.. මම ඒ ජීවිතේ විඳින්න සූදානම් වෙනවා……..

අතීතයෙන් ගඟ ගලා බසී

සිඳී බිඳී ගල් පර අතරේ

සිනා සිසී සුදු පෙණ පොකුරේ

ගලා බසී……..ගඟ ගලා බසී………..

« Older entries

Follow

Get every new post delivered to your Inbox.