.අරවින්දගේ වියමන.

ජනමාධ්‍ය වේදියා යනු සරල ව කිවහොත් ජනතාවට යම් මාධ්‍යයක් හරහා තොරතුරු ලබා දෙන තැනැත්තෙකි. අනිවාර්යයෙන් ම ජනමාධ්‍යවේදියා  එයට වගකීමෙන් බැඳීසි සිටී.  ගැටලුව වන්නේ අප ජනමාධ්‍යවේදීන් වන්නේ නම් බ්ලොගර්කරුවන් ලෙස ජනතාවට තොරතුරු ලබා දෙමින් ජනතාව සමග නිරන්තර සංවාදයක යෙදෙන්නේ ද යන්නයි.

බිලොගර්කරුවා ජනතාවට ‍තොරතුරු ලබා දෙයි යන්න ජාත්‍යන්තර වශයෙන් ගත් කල පිළිගත හැකි ය. නමුත් සිංහල බ්ලොගර්කරුවන්ගේ සංසදයේ බිලොගර් කරුවන්ට මෙම කරුණ අදාළ වේ ද? මේ ලියන මොහොත වන විට අප සංගමයේ සාමාජික සංඛ්‍යාව 124කි. වෙනත් වචන වලින් කිවහොත් මේ ලියන බ්ලොග් කියවන, මේ 124 දෙනාගෙන් බාහිර පිරිස ඉතා අඩු බවයි. ඉදින් අපි ජනතාවට තොරතුරු ලබා දෙන්නෝ වන්නෙමු ද?

නිසැකව ම සාමාන්‍ය ජනමාධ්‍යවේදියෙකුට ක්ෂේත්‍රයේ පවතින සීමා මායිම්  කඬුලු බ්ලොගර්කරුවන්ට නැත. එබැවින් බ්ලොගර්කරුව්නගේ ක්ෂේත්‍රය ජාත්‍යන්තර වශයෙන් ඉතා පුළුල් ජනසන්නිවේදන මාධ්‍යයක් බවට පත් ව ඇත. නමුත් ලංකාව තුළ මෙය තවමත් ප්‍රචලිත නැත. මෙවන් තත්ත්වයක් යටතේ පසුගිය දිනවල සංගමයේ කතාබහට  ලක් වූ පරිදි බ්ලොගර්කරුවන්ගේ ලෝකයට ලාංකිකයන් ගෙන ඒමේ වැඩපිළිවෙලක් අප විසින් දියත් කළ යුතු ව ඇත.

අප එතැනින් නැවතිය යුතු ද?. ලාංකික බ්ලොග් ලියන්නන් ගණනින් වැඩි වීම පමණක් පුමාණවත් නොවේ.  අප අතර වන කතාබහ පරිගණක ක්ෂේත්‍රයටත් අන්තර්ජාල කටයුතුවලටත් පමණක් සීමා නොවී ජාත්‍යන්තර වශයෙන්, විශේෂයෙන් ම රටක් ලෙස අපට බලපාන සමාජ, ආර්ථික, දේශපාලන, කලා කටයුතු සම්බන්ධ  බුද්ධිමත් සංවාදයකට  මඟ පෑදිය යුතු බව මගේ අදහසයි.